Технологийн товхимол шинэ дугаар

Өглөөний мэнд 👋

Пүрэв гарагийн мэнд хүргэж, шинэ дугаараараа мэндчилж байна. Өнгөрсөн 7 хоногийн дугаар маань та бүхэнд таалагдсан гэж найдаж байна.

Нэгэнт өглөө эрт босоод, ажилдаа гарахаасаа өмнө түргэхэн шиг товхимлыг маань гүйлгэж хараад гарах гэсэн уншигчдынхаа цаг завыг хэмнэх үүднээс мэдээллүүдийнхээ товч агуулгад илүүтэй анхаарч байгаагаа дуулгамаар байна.

🤖 AI Салбарт

Хиймэл оюун(AI)-ы загалмайлсан эцэг гэгддэг Жоффри Хинтон саяхан өгсөн ярилцлагадаа “Илүү өндөр түвшний AI бүтээгдэх нь цаг хугацааны асуудал болсон. Хүмүүс одооноос болгоомжтой хандаж, энэ салбарын хөгжлийг зохицуулахгүй бол тун удахгүй машинууд хүмүүсийг давж гарах хэмжээнд ирээд байна, хүмүүс машиныг удирдаж, сургасан бол удахгүй машинууд хүн төрөлхтөнийг manipulate хийхэд гайхах зүйлгүй боллоо“ гэхчлэн сонирхолтой ярилцлага өгчээ. Хэрэв та дэлгэрүүлж сонирхвол энд дараарай.

Google компани Vertex AI платформ дээрээ нэгэн шинэ нэмэлт танилцуулсан нь Med-PaLM 2 анагаах ухааны чиглэлээр сургагдсан AI модельд суурилжээ. Өөрөөр хэлбэл, анагаахын салбарын олон тооны судалгаа, өгөгдөл, оношилгоо, үзлэгийн зурагнууд, тэр ч бүү хэл геномын датан дундаас AI ашиглан, хайлт хийлгэх боломжтой гэсэн үг. Тэгэхээр яваандаа эмч нар шинжилгээ болон скрийнингийн зураг, өгөгдлөө AI-д оруулж, өвчтөний оношийг илүү нарийн оновчлолтой тодорхойлоход дөхөм болох нь гэж ойлгогдож байна. Ер нь л Google эрүүл мэндийн чиглэлийн үйлчилгээг цахимжуулах чиглэлээр эрчимтэй ажиллаж байгаа гэсэн шүү.

AI идэвхитэй сонирхогчид дунд хиймэл оюунаас асуулт асуухдаа “ямар бизнес хийвэл зүгээр вэ, юуг яаж хийвэл ашигтай вэ” гэх мэт асуултууд асууж үзээгүй хүн ховор биз 🙂 Тэгвэл энэ удаа үнэхээр бизнесийн санаа сэдэж, сэтгэдэг AI гарсан байна шүү. Туршаад үзээрэй.

🏢 Технологийн компаниуд

Өнгөрсөн амралтын өдрүүдээр Палестины Хамас бүлэглэл Израйлийн өмнөд хэсгийн хотууд руу дайран орж, олон тооны энгийн иргэдийг хөнөөж, халдлага үйлдсэнийг мэдсэн байх. Дайны хажуугаар дажин гэгчээр X буюу хуучнаар Твиттер платформ дээр дайн, тулааны холбогдолтой маш олон хуурамчаар үйлдсэн бичлэг, зургууд нийтлэгдэж, гадаад орчинд X платформыг худал мэдээлэл түгээгч суваг хэмээн шүүмжлэгдэхэд хүргэв. X-н бүх юмны дарга Илон хүртэл хуурамч мэдээ түгээдгээрээ зартай хаягны постыг сэвж, байдлыг бүр ч дордуулсан мэдээтэй.

Twitter шинэ эзэнтэй болсноор түүнтэй улстөрийн чиг шугам зөрдөг маш олон хэрэглэгчид өөр платформ руу дүрвэх хэрэгцээ гарсан билээ. Тэд Threads, Bluesky, Pebble, Spill зэрэг төстэй үйлдэл санал болгодог олон нийтийн сүлжээний платформууд руу нүүсэн ба энэ төрлийн платформуудаас хамгийн амжилттай явж байгаа нь Mastodon болжээ. Mastodon нь open source, мөн decentralized бүтэцтэй гэдгээрээ онцлог бөгөөд саяхан компанийн захирал мэдэгдэл хийхдээ сүлжээний холболтын алдаанаас болоод бид шинээр нэмэгдсэн 400 мянга гаруй хэрэглэгчээ дутуу бүртгэсэн байна, одоо бид албан ёсоор 2,34 сая хэрэглэгчтэй болсон шүү гэж. Яваандаа цахиур хагалах юм биш биз дээ..

Австралийн New South Wales мужид баригдаж, ашиглалтад орсон 150 MW/300 MWh хүчин чадалтай Tesla батарейн систем буюу эрчим хүчний хуримтлуур нь нүүрс түлдэг дулааны цахилгаан станцууд халаагаа өгөхөөр эрчим хүчний системийн найдвартай ажиллагааг хангах зорилготой гэнэ. Учир нь нарны эрчим хүч нь өдөр шөнө ээлжлэх болон, бүрхэг өдрүүдэд эрчим хүч тогтвортой үүсгэж чаддаггүй тул хуримтлуураас нэмэлт эрчим хүч системд нийлүүлж, тогтвортой байлгах юм. Энэ том хуримтлуурыг Edify Energy болон Federation Asset Management компаниуд байгуулжээ.

Нэг өгүүлбэрээр:

Canva-ийн Magic Studio үнэхээр ид шидтэй санагдах нь уу?

Х буюу Твиттерт зөвхөн цэнхэр тэмдэгтэй хэрэглэгчид л хариу бичих боломжтой пост ордог болов.

Amazon Prime Day 2023 арга хэмжээний хямдрал хаагдахад хэдхэн цаг үлдлээ.

Adobe Firefly 2 нэртэй AI зураг дүрслэл үүсгэгч/засварлагчаа гаргалаа.

Apple компани Vision Pro шилнийхээ илүү сайжруулсан, хөнгөн хувилбарыг 2025-2027 онд гаргана.

Google Passkey гээчийн талаар эндээс уншаарай.

Энд хүрээд манай энэ 7 хоногийн дугаар өндөрлөж байна. Зав гарган уншсан танд баярлалаа. Өдрийг сайхан өнгөрүүлээрэй.