TechnoSphere товхимол

Сайн байна уу,

Манай товхимолд нэгдэж байгаад маш их баярлалаа. Техник технологийн ертөнцийн хамгийн сүүлийн үеийн мэдээ, мэдээллийг нэг доор багцлан хүргэх TechnoSphere товхимол нь 7 хоногт нэг удаа таны гарт очих болно.

📆 Юу уншина гэсэн хүлээлттэй байх вэ?

Дөнгөж эхэлж буй, “ногооноороо” байгаа мэдээллийн товхимол учир эхний ээлжинд бид 7 хоногт нэг удаа дараах сэдвүүдээр мэдээллийг багцалж хүргэх болно. Яваандаа бид хамрах сэдвийн хүрээ, давтамжаа нэмэгдүүлэхийг зорин ажиллах болно.

- AI технологийн эргэн тойрны мэдээ, мэдээлэл: Шинэ бүтээгдэхүүн, үйлчилгээ, хиймэл оюун, машин сургалтын орчны хамгийн сүүлийн үеийн үйл явдлуудын талаар.

- Авто технологи: Авто ертөнцийн эргэн тойрны мэдээ мэдээлэл, шинэ содон үйл явдлууд, тухайлбал, цахилгаан хөдөлгүүртэй, автомат жолоодлоготой автомашинууд, авто шоуны талаарх мэдээллүүд.

- Программ хангамж, аппликэйшн, үйлчилгээнүүд: Өдөр тутмын ажил хөдөлмөр хөнгөвчлөх, ажлын бүтээмжийг хэд дахин нугалах чадалтай программууд болон үйлчилгээнүүд өдөр тутам шинээр мэндэлж байхад та ч бас үүнээс хоцормооргүй байгаа биз дээ?

- Эрчим хүч, харилцаа холбооны шийдлүүд: Сэргээгдэх эрчим хүч, харилцаа холбоо, интернэт орчин, ухаалаг хотын шийдлүүд.

- Технологийн компаниуд: Технологийн ертөнцийн сонин хачныг дуулгахдаа технологийн компаниудыг орхигдуулна гэж юу байхав. Технологийн аваргуудаас эхлээд гарааны бизнесүүдийн талаарх сүүлийн үеийн мэдээ, мэдээллүүд энд багтана.

🔍 TechnoSphere-г уншсанаар яана гэж?

Хөгжил дэвшил нь минут, секундээр хэмжигдэж байдаг технологийн ертөнцийн элдэв үйл явдал бидний өдөр тутмын амьдралд их бага янз бүрээр нөлөөлж байдаг билээ. Энэ орчны сүүлийн үеийн чиг хандлага, өнгө аяс, шинэ бүтээгдэхүүн, үйлчилгээнээс хоцрохгүй байж, ажил бизнесийн шинэ санаа гаргах болон шийдвэр гаргахад тань туслах мэдээ, мэдээллүүдийг тогтмол илгээхээр хичээх болно.

🔗 Орж гарч байгаарай хө!

Дан ганц уншаад, скроллдоод өнгөрөлгүй, хариу бичиж, санаа оноогоо илгээгээрэй гэж хүсье. Асуулт, зөвөлгөө, санал, гомдол, дараагийн дугаарт юуны талаар мэдмээр байгаа зэрэг ямар ч асуудлаар таныг сонсоход бид бэлэн байна.

📣 Түмэнд түгээж биднийг дэмжээрэй

Манай бичвэрүүд, мэдээллүүд танд таалагдвал дан ганцаараа “булагнаад” өнгөрөх биш харин найз нөхөд, танилууддаа түгээж өгөөрэй, pls. Шэйр, шэйр!

TechnoSphere-т нэгдсэнд дахин баярлалаа. Технологийн ертөнц дэх мэдээ мэдээллийн далай дундаас хамгийн сонирхолтой, чанартайг нь түүж хуваалцахаа “амалжийнаа”!

Хүндэтгэсэн,

Ууганбаяр. Б

TechnoSphere