Technosphere 10 дахь дугаар

TechnoSphere товхимлын 10 дахь дугаар

Та бүхэндээ өглөөний мэнд хүргэж, ийнхүү 10 дахь дугаараараа уулзаж байна. Өмнөх дугаарууд маань танд таалагдаж байсан гэдэгт итгэж байна. Бид энэ удаагийн дугаартаа удахгүй зохиогдох гэж буй нэгэн арга хэмжээг ерөнхийдөө онцолж, бусад мэдээллийг товч байдлаар хүргэх болно.

GOOGLE Хөгжүүлэгчдийн хамгийн том арга хэмжээ болох “DEVFEST ULAANBAATAR 2023”

Google компаниас санаачлан хөгжүүлэгчдийн дунд зохион байгуулж дэлхий даяар 100 гаруй орны хагас сая орчим хөгжүүлэгчдийг хамардаг “DEVFEST 2023” арга хэмжээ 11-р сарын 18-нд буюу энэ долоо хоногийн бямба гарагт Улаанбаатар хотноо нэг өдрийн турш болох гэж байна.

Монгол хөгжүүлэгчид, технологийн салбарынхан дэлхийн технологийн хөгжилтэй зэрэгцэн алхах, мэдээлэл, боломжид ойр байхад нь туслах зорилгоор Google Developer Groups (GDG) Ulaanbaatar албан ёсны чаптер нь тус эвентийг хоёр дахь жилдээ зохион байгуулж байгаа бөгөөд энэ жил үйл ажиллагааны цар хүрээгээ тэлж 30 гаруй илтгэгч, 300 орчим оролцогчтойгоор зохион байгуулах ажээ.

Технологийн салбарт ажиллаж байгаа туршлагатай хөгжүүлэгч, мэргэжилтнүүд, ур чадвараа нэмэгдүүлж салбарын хөгжлийн чиг хандлагын талаарх үнэ цэнтэй мэдээлэл авах сонирхолтой оюутан залуучууд, зөвхөн хөгжүүлэгчдээр зогсохгүй технологийн салбарт сонирхолтой оролцогчдыг нэгтгэж нэг өдрийн турш мэдлэг мэдээлэл хуваалцах, харилцаа холбоо үүсгэж, цаашдын хамтын ажиллагааны сууриа тавих боломжийг олгож байгаагаараа энэ удаагийн эвент онцлогтой болж байна.

Арга хэмжээнд ирснээр та:

• Firebase, Flutter, Tensorflow, Google Maps, Cloud зэрэг Google технологиуд дээр мэргэшсэн дотоодын болон гадны чалварлаг инженер, хөгжүүлэгчдийн туршлага болон

• Бусад сүүлийн үеийн технологийн болон хувь хүний хөгжлийн сэдвээр явагдах илтгэлүүдийг сонсох;

• Flutter, Firebase технологиуд дээр мэргэшсэн инженерүүдийн болон Storytelling арга ашиглан хувь хүний болон бүтээгдэхүүнийхээ брэндийг таниулах тухай workshop сургалтуудад хамрагдах;

• Нийгмийн асуудлыг технологи, тэр дундаа Google-ийн технологи хэрхэн шийдэж байгаа талаарх салбар хэлэлцүүлэг;

• Google технологи хөгжүүлэгчидтэй танилцах, танилын хүрээгээ тэлэх,

• Google Developer Group Ulaanbaatar, Google Developer Student Club Ulaanbaatar, Women Techmakers Mongolia коммюнити болон хамтран зохион байгуулагч, технологийн хөгжлийг дэмжигч байгууллагуудын үйл ажиллагаатай танилцах боломжтой юм байна.

• Хөтөлбөрийг эндээс татаж авч үзнэ үү.

Devfest Ulaanbaatar 2023 арга хэмжээ 11-р сарын 18-ны 10:00 цаг Aurug Place-т болох ба тасалбар, илтгэгчдийн жагсаалт болон хөтөлбөрийн дэлгэрэнгүй мэдээллийг Devfest 2023 - A community-run one-day conference (gdg.mn) вебсайтаас авна уу. Арга хэмжээний Фэйсбүүк холбоос энд байна. Холбоо барих: 9989 2055, 8080 0212

Энэ ташрамд сонирхуулахад,

• Google DevFest 2022 арга хэмжээ нь дэлхийн 100 гаруй хотод зохиогдсон.

• Уг арга хэмжээнүүдэд спийкер болон оролцогч байдлаар 10000 гаруй хүн хамрагдсан.

• Тухайн уулзалтуудаар Android систем, үүлэн тооцоолуур, машин сургалт, хиймэл оюун ухаан гээд өнөө цагийн хамгийн халуухан сэдвүүд хэлэлцүүлэгджээ.

Нэг өгүүлбэрээр

Америкийн цагаар маргааш Starship хөлгийн тойрог замын туршилтын нислэгийг SpaceX компани гүйцэтгэнэ.

Цаг агаарын төлөв байдлыг гаргах тал дээр AI анх удаа уламжлалт компьютерийг ардаа орхижээ.

Microsoft Copilot AI программыг Windows 11 үйлдлийн системтэй хамтдаа асдаг болгоно

Түрээсийн байрны Airbnb компани AI хөгжүүлэгч компани худалдан авсан гэнэ.

2 жил тутамд шинэчлэгддэг хамгийн хурдан суперкомпьютеруудын жагсаалт шинэчлэгджээ.

Непал улсын засгийн газраас TikTok-г нутаг дэвсгэртээ хориглосон шийдвэр гаргав.

Nvidia компани ChatGPT-г илүү хурдан болгох чадвартай H200 чип гаргаж байна.

Өнөөдрийн дугаараа энд хүргээд өндөрлүүлж байна. Технологи сонирхогч та бүхэн DevFest 2023 арга хэмжээг сонирхоод нэг үзээрэй.